- Auglýsing -

Molakaffi: Victor, Egill, Jakob, Kristinn, pólskir dómarar, Radicevic

Mynd/Hafliði Breiðfjörð
  • Victor Máni Matthíasson skoraði tvisvar sinnum fyri StÍF í naumu tapi, 31:30, fyrir VÍF í keppnishöllinni í Vestmanna á sunnudagskvöldið þegar liðin mættust í færeysku úrvalsdeildinni í handknattleik. Egill Már Hjartarson skoraði ekki fyrir StÍF-liðið í leiknum. StÍF var með þriggja marka forskot í hálfleik, 16:13, en leikmenn VÍF voru harðir í horn að taka og náðu mest fjögurra marka forskoti þegar fimm mínútur voru til leiksloka, 29:25. 
  • StÍF er næst neðst í færeysku úrvalsdeildinni með fimm stig eftir átta leiki. KÍF frá Kollafirði, sem Hörður Fannar Sigþórsson lék með um árabil, er efst með 14 stig eftir átta leiki. VÍF er næst á eftir með 13 stig. 
  • Kyndill, liðið sem Jakob Lárusson þjálfar, tapaði fyrir Stjørnunni á heimavelli á sunnudaginn, 31:27, í úrvalsdeild kvenna í Færeyjum. Kyndill er efstur með 15 stig eftir 10 leiki, hefur jafnmörg stig og H71 sem leikið hefur tveimur leikjum færra. H71 komst um helgina í 16-liða úrslit Evrópubikarkeppni kvenna með því að leggja Slavíu frá Prag samanlagt, 56:53, í tveimur leikjum sem fram fóru í Þórshöfn á laugardag og sunnudag. 
  • Kristinn Guðmundsson fagnaði sínum fyrsta sigri í færeysku úrvalsdeild kvenna á sunnudaginn þegar EB frá Eiði vann VB í Höllinni í Vági, 22:20. Kristinn þjálfar lið EB.
  • Pólverjarnir Bartosz Leszczynski og Marcin Piechota dæma viðureign Ferencváros og Vals í fimmtu umferð B-riðils Evrópudeildarinnar í handknattleik karla sem fram fer í Búdapest í kvöld. Nicolae Vizitiu frá Moldóvu verður eftirlitsmaður EHF. Leikurinn hefst klukkan 17.45. Valur vann fyrri viðureign liðanna í riðlakeppninni, 43:39, í Origohöllinni þriðjudaginn 25. október. 
  • Svartfellska handknattleikskonan Jovanka Radicevic varð um nýliðna helgi markahæsti leikmaður í sögu Meistaradeildar kvenna í handknattleik. Radicevic hefur skorað 1.017 mörk og komst marki upp fyrir ungversku goðsögnina  Anita Görbitz sem skoraði 1.016 mörk í Meistaradeildinni á sínum ferli.
- Auglýsing -
- Auglýsing -

Nýjustu fréttir

- Auglýsing -