Molakaffi: Viktor, Aron, Arnór, Sandra, Lilja, Steinunn, Elín, Haukur, Aðalsteinn, Tumi, Anton, Örn

• Viktor Gísli Hallgrímsson stóð í marki GOG annan hálfleikinn í gær þegar liðið vann Holstebro, 32:30, á heimavelli í dönsku úrvalsdeildinni í gær. Hann varði fimm skot, 28%. GOG er efst í deildinni með 41 stig eftir 21 leik. 

• Aron Pálmarsson var fjarri góðu gamni vegna meiðsla þegar Aalborg Håndbold vann Ringsted, 32:31, á útivelli í dönsku úrvalsdeildinni í gær. Aron er ennþá frá keppni vegna meiðsla sem hann hlaut í viðureign Íslands og Svartfjallalands á EM í handknattleik í síðasta mánuði. Arnór Atlason er aðstoðarþjálfari Álaborgarliðsins. Lukas Sandell skoraði sigurmark Aalborg þegar 20 sekúndur voru til leiksloka. Aalborg er í öðru sæti deildarinnar, sex stigum á eftir GOG.

• Sandra Erlingsdóttir skoraði fimm mörk, þar af tvö úr vítaköstum, þegar EH Aalborg tapaði með fjögurra marka mun á heimavelli, 32:28, fyrir TMS Ringsted í dönsku 1. deildinni í handknattleik í gær. EH Aalborg er í fjórða sæti deildarinnar, 12 stig um á eftir SönderjyskE sem er í efsta sæti. 
  
• Lilja Ágústsdóttir skoraði eitt mark í fjórum tilraunum þegar lið hennar, Lugi, tapaði með sex marka mun, 32:26, fyrir Skövde í sænsku úrvalsdeildinni í handknattleik kvenna í gær. Leikurinn fór fram í Skövde. Lugi situr í sjötta sæti deildarinnar með 17 stig eftir 15 leiki. Skuru er efst með 30 stig að loknum 17 leikjum. 

• Steinunn Hansdóttir skoraði ekki fyrir Skanderborg í gær þegar liðið vann Ringköbing í dönsku úrvalsdeildinni í handknattleik í gær, 27:22. Elín Jóna Þorsteinsdóttir varði níu skot, þar af eitt vítakasti, í marki Ringköbing. Skanderborg er í 10. sæti deildarinnar 14 liðum með 13 stig þegar fimm umferðir eru eftir. Ringköbing er næst neðst með 10 stig. 

• Haukur Þrastarson skoraði þrjú mörk, öll í fyrri hálfleik, þegar Łomża Vive Kielce vann Górnik Zabrze, 37:28,  í pólsku úrvalsdeildinni í gær. Sigvaldi Björn Guðjónsson tók ekki þátt í leiknum en hann hefur verið frá keppni síðan að EM lauk. Meiðsli þau sem hrjáðu Sigvalda fyrir EM tóku sig á mótinu en hann var undir miklu álagi. Łomża Vive Kielce er efst í deildinni með 48 stig eftir 16 leiki, er þremur stigum á undan Wisla Plock.
  
• Aðalsteinn Eyjólfsson og lærisveinar hans í Kadetten Schaffhausen unnu nauman sigur RTV Basel á útivelli í gærkvöld í svissnesku A-deildinni í handknattleik, 22:21, eftir að hafa verið 11:7 undir að loknum fyrri hálfleik. Á sama tíma tapaði meistaraliðið Pfadi Winterthur fyrir Zürich, 22:21. Kadetten-liðið er sem fyrr langefst í deildinni, hefur nú 36 stig eftir 19 leiki. Pfadi er næst með 28 stig að loknum 20 leikjum.
  
  
• Tumi Steinn Rúnarsson skoraði tvö mörk í fjórum skotum fyrir Coburg þegar liðið tapaði naumlega, 28:26, fyrir Empor Rostock í þýsku 2.deildinni á heimavelli í gærkvöld. Coburg var tveimur mörkum yfir að loknum fyrri hálfleik, 15:13. 

• Ekki gekk betur hjá Antoni Rúnarssyni og Erni Vésteinssyni Östenberg og liðsfélögum í TV Emsdetten. Þeir biðu lægri hlut í heimsókn til Nordhorn, 27:20.  Anton skoraði fjögur mörk í átta skotum og átti fjórar stoðsendingar. Örn skoraði þrjú mörk í átta skotum á átti einnig fjórar stoðsending fyrir lið Emsdetten. 

• Viðureign Lübcek-Schwartau og EHV Aue, sem Arnar Birkir Hálfdánsson og Sveinbjörn Pétursson leika með, var frestað. 

Staðan í þýsku 2. deildinni: