- Auglýsing -
- Viktor Gísli Hallgrímsson og samherjar í Nantes færðust upp í annað sæti B-riðils Meistaradeildar Evrópu í gærkvöld með þriggja marka sigri á Aalborg Håndbold, 35:32, í Álaborg. Tölfræði leiksins hjá EHF en í skötulíki en samkvæmt gleggstu upplýsingum sem handbolti.is hefur fengið varði Viktor Gísli amk 15 skot og var sannarlega maðurinn reið baggamuninn fyrir Nantes. Hann gaf tóninn í upphafi leiks og lagði þar með grunn að forskoti sem Nantes náði og hélt meira og minna til leiksloka. Aron Pálmarsson skoraði tvö mörk fyrir Aalborg sem er í fjórða sæti B-riðils með sjö stig eftir sjö leiki.
- Díana Dögg Magnúsdóttir skoraði fimm mörk, átti fjórar stoðsendingar, þrjú sköpuð færi og vann tvö vítaköst auk þess að vinna einn leikmanna af leikvelli í gærkvöld þegar lið hennar, BSV Sachsen Zwickau steinlá fyrir SV Union Halle-Neustadt, 31:22, á útivelli i þýsku 1. deildinni í handknattleik. Díana Dögg og félagar byrjuðu leikinn vel og komust yfir, 8:3 og 11:8, áður en allt fór í skrúfuna í síðari hálfleik. “Skelfilega lélegur leikur. Verður ekki verra og verst að það kom á móti svona lélegu liði. Kraftlaust bæði í vörn og sókn,” sagði Díana Dögg þung á brún í svari við skilaboðum handbolta.is í gærkvöld.
- Þetta var fyrsti sigur SV Union Halle-Neustadt í deildinni á keppnistímabilinu. Með sigrinum komst liðið upp fyrir BSV Sachsen Zwickau sem er næst neðst með tvö stig eftir sex leiki.
- Ólafur Andrés Guðmundsson var ekki í leikmannahópi GC Amicitia Zürich þegar liðið vann RTV 1879 Basel með eins marks mun, 26:25, í Basel í gærkvöld í svissnesku A-deildinni í handknattleik karla. GC Amicitia Zürich er í fjórða sæti deildarinnar. Ekki fannst skýring seint í gærkvöld á fjarveru Ólafs sem leikið hefur afar vel með GC Amicitia Zürich á leiktíðinni.
- Óskar Ólafsson skoraði tvö mörk og Viktor Petersen Norberg fimm þegar lið þeirra, Drammen, vann Bækkelaget, 38:32, í Nordstrand Arena í gær en leikurinn var liður í 11. umferð norsku úrvalsdeildarinnar. Drammen skaust upp í annað sæti deildarinnar með þessum góða sigri. Drammen hefur 16 stig að loknum 11 leikjum og er fjórum stigum á eftir Kolstad sem hefur aðeins lokið 10 leikjum.
- Auglýsing -
