- Auglýsing -
- Viktor Petersen Norberg skoraði fjögur mörk og Óskar Ólafsson eitt þegar lið þeirra, Drammen, tapaði fyrir Runar, 37:27, í uppgjöri liðanna um þriðja sætið í norsku úrvalsdeildinni í handknattleik í Sandefjord í gærkvöld. Runar hafnar þar með í þriðja sæti deildarinnar. Liðið er þremur stigum fyrir ofan Drammen fyrir síðustu umferðina, sem leikin verður á sunnudaginn. Kolstad hefur fyrir löngu tryggt sér norska meistaratitilinn og Elverum annað sæti.
- Tomas Axnér hefur framlengt samning sinn um þjálfun sænska kvennalandsliðsins til þriggja ára, fram á sumarið 2026. Fyrri samningur Axnér við sænska handknattleikssambandið átti að renna út sumarið 2024. Axnér var ráðinn landsliðsþjálfari árið 2020.
- Karlalandslið Úkraínu í handknattleik leikur síðasta heimaleik sinn í undankeppni EM 2024 á heimavelli Íslendingaliðsins Gummersbach, SCHWALB-arena 30. apríl. Síðast lék úkraínska landsliðið heimaleik í keppnishöllinni í Coburg í mars og í október á heimavelli TV Großwallstadt.
- Mikillar óánægju gætir á meðal leikmanna og þjálfara liðanna fjögurra sem leika til úrslita í dönsku bikarkeppninni í kvennaflokki um helgina. Ástæða óánægjunnar er sú að aðeins tvö af fjórum besti dómarapörum landsins dæma leikina fjóra sem fyrir dyrum standa. Tíunda besta par landsins á m.a. að dæma einn leikjanna. Bestu dómararnir eiga að dæma undanúrslita- og úrslitaleikina (einnig er leikið um bronsverðlaun), segja þjálfararnir en tala fyrir daufum eyrum.
- Auglýsing -
