- Auglýsing -
- Viktor Gísli Hallgrímsson og félagar í Nantes unnu PAUC, 39:28, á heimavelli í frönsku 1. deildinni í handknattleik í gær. Viktor Gísli stóð í marki Nantes hluta leiksins og varði sjö skot. Kristján Örn Kristjánsson er í veikindaleyfi og lék ekki með PAUC sem er í áttunda sæti deildarinnar með 17 stig. Nantes er áfram í þriðja sæti með 32 stig að loknum 19 leikjum.
- Tumi Steinn Rúnarsson var ekki í leikmannahópi Coburg í gær þegar liðið tapaði fyrir Eintracht Hagen, 35:32, á heimavelli í þýsku 2. deildinni í gær. Coburg er í 11. sæti af 20 liðum deildarinnar með 21 stig að loknum 24 leikjum.
- Hannes Jón Jónsson og liðsmenn hans í Alpla Hard komust í gærkvöld í undanúrslit austurrísku bikarkeppninnar í handknattleik karla með sigri á Handball Tirol, 28:27, í hörkuleik í Bregenz. Tírólarliðið var fjórum mörkum yfir að loknum fyrri hálfleik, 14:10. Alpla Hard mætir West Wien í undanúrslitum bikarkeppninnar.
- Ólafur Andrés Guðmundsson er ennþá frá keppni vegna meiðsla og var þar af leiðandi ekki með liði sínu, GC Amicitia Zürich, þegar það vann öruggan sigur á RTV 1879 Basel, 29:21, í svissnesku A-deildinni í gær. GC Amicitia Zürich situr í fjórða sæti.
- Óðinn Þór Ríkharðsson skoraði fimm mörk fyrir Kadetten Schaffhausen þegar liðið tapaði fyrir Wacker Thun, 31:29, í svissnesku A-deildinni í handknattleik í gær. Aðalsteinn Eyjólfsson er þjálfari Kadetten sem er áfram í öðru sæti deildarinnar.
- Janus Daði Smárason skoraði sex mörk og Sigvaldi Björn Guðjónsson fimm þegar Kolstad vann Drammen með 12 marka mun í Þrándheimi í gær. Viðureign liðanna var liður í 18. umferð deildarinnar. Kolstad hefur 36 stig þegar liðið á fjóra leiki eftir og vantar aðeins eitt stig til þess að verða norskur meistari en liðið sem vinnur deildina hampar meistaratitlinum. Sigurlið úrslitakeppninnar verður hinsvegar aðeins úrslitakeppnismeistari ólíkt því sem er í flestum löndum þar sem úrslitakeppni er á annað borð.
- Óskar Ólafsson og Viktor Petersen Norberg skoruðu eitt mark hvor fyrir Drammen í leiknum gegn Kolstad. Drammen er í þriðja sæti deildarinnar með 23 stig.
- Orri Freyr Þorkelsson skoraði einu sinni fyrir Elverum í öruggum sigri á Halden í Terningen Arena í Elverum í gær. Elverum er í öðru sæti deildarinnar með 30 stig eftir 19 leiki.
- Auglýsing -
