- Auglýsing -
- Ondřej Zdráhala hefur verið kjörinn forseti tékkneska handknattleikssambandsins. Zdráhala er 37 ára gamall og varð markakóngur EM í handknattleik 2018. Hann leikur nú með Al-Wakrah SC í Katar en ætlar að leggja skóna á hilluna í vor.
- Uppstokkun er að eiga sér stað innan tékkneska handknattleikssambandsins eftir að stjórnin sagði báðum þjálfurum karlalandsliðsins upp störfum í janúar og sagði síðan af sér í framhaldinu. Ástæða þessa voru lausatök og kæruleysi við undirbúning karlalandsliðsins fyrir HM sem varð þess valdandi að það varð að draga sig úr keppni á HM á elleftu stundu þegar aðeins fjórir leikmenn stóðu eftir ósmitaðir af kórónuveirunni sólarhring fyrir brottför til Egyptalands.
- Zdráhala á að stjórna tiltektinni og byggja upp traust til tékkneska handknattleikssambandsins á nýjan leik. Uppákoman í janúar þykir vera mesti álitshnekkir sem handnattleikur hefur orðið fyrir þar í landi.
- Báðir leikmenn danska landsliðsins sem eru samningsbundnir Füchse Berlin komu til félagsins smitaðir af kórónuveirunni úr landsleikjum. Eins og handbolti.is greindi frá í gærmorgun var Hans Lindberg smitaður og í gær greindi Berlínarliðið frá því að Jacob Holm sæti í sömu súpu. Hvorugur þeirra hafði mætt á æfingu með liðinu þegar smitin greindust. Þess vegna eru samherjar þeirra hjá Füchse Berlin ekki útsettir fyrir veirunni af þeirra völdum. Liðið getur því leikið sína leiki í þýsku 1. deildinni á næstu dögum. Lindberg og Holm eru í einangrun.
- Lasse Møller er þriðji danski landsliðsmaðurinn sem greinist smitaður af kórónuveirunni. Hann varð að draga sig út úr landsliðshópnum fyrir fyrri leikinn við Norður-Makedóníu í undankeppni EM á síðasta fimmtudag vegna meiðsla. Hélt hann þá heim á leið. Møller verður þar af leiðandi ekki aðeins frá keppni vegna þrálátra hné meiðsla næstu vikurnar heldur líka vegna veirunnar. Møller er samningsbundinn Flensburg.
- Filip Mirkulovski, landsliðsmaður Norður-Makedóníu og leikmaður Wetzlar, tekur ekki þátt í þremur næstu leikjum liðsins, hið minnsta. Mirkulovski greindist smitaður við komuna til Þýskalands eftir að hafa verið heima í Norður-Makedóníu og í Danmörku vegna tveggja leikja landsliðsins.
- Auglýsing -
