- Auglýsing -
- Sandra Erlingsdóttir var valin maður leiksins þegar EH Aalborg vann Lyngby í dönsku B-deildinni á laugardaginn, 27:18. Sandra hefur leikið afar vel með liðinu í fyrstu leikjum þess á keppnistímabilinu.
- Viggó Kristjánsson, landsliðsmaður í handknattleik nýtti tækifærið vel þegar hann lék fyrir framan landsliðsþjálfarann, Guðmundur Þórð Guðmundsson um helgina, er Viggó og félagar í Stuttgart mættu Melsungen í æfingaleik. Viggó skoraði sex mörk. Það dugði ekki til sigurs þar sem Melsungen var sterkara liðið og vann með tveggja marka mun, 29:27. Arnar Freyr Arnarsson skoraði þrjú mörk fyrir Melsungen. Elvar Ásgeirsson komst ekki á blað að þessu sinni fyrir Stuttgart.
- Bergsicher HC, liðið sem Arnór Þór Gunnarsson og Ragnar Jóhannsson leika með, hafnaði í þriðja sæti á æfingamóti sem TuS N-Lübbecke stóð fyrir um helgina en Bergischer vann einmitt gestgjafana í leiknum um þriðja sætið eftir vítakeppni en jafnt var að loknum venjulegum leiktíma, 26:26. Arnór Þór skoraði fjögur mörk í leiknum, þar af þrjú út vítaköstum, og Ragnar Jóhannsson skoraði tvisvar sinnum. SC DHfK Leipzig stóð uppi sem sigurvegari á mótinu. Liðið lagði Minden í úrslitaleik. Minden vann Bergischer í undanúrslitum, 29:28.
- Keppni í efstu tveimur deildum karla í Þýskalandi hefst um mánaðarmótin.
- Franski landsliðsmaðurinn og línumaðurinn þrautseigi Cédric Sorhaindo framlengdi í sumar samning sinn við Barcelona til eins árs.
- Auglýsing -
