Hornamaðurinn eldfljóti Úlfar Páll Monsi Þórðarson hefur ákveðið að ganga á ný til liðs við Val°að loknu yfirstandandi keppnistímabili. Hann hefur leikið með Aftureldingu og áður Stjörnunni fjögur ár, þar af síðustu þrjú með Aftureldingu. Frá þessu greinir handknattleiksdeild Vals í dag í tilkynningu.
Monsi er uppalinn Valsmaður og kemur úr hinum þekkta 2000 árgangi sem í eru nokkrir þekktir leikmenn sem hafa skilað sér upp í meistaraflokk úr öflugu yngri flokka starfi félagsins. Má þar m.a. nefna Tuma Stein Rúnarsson, Stiven Tobar Valencia, Tjörva Tý Gíslason og Arnór Snæ Óskarsson.
Monsi kemur í stað Stiven Tobar Valencia sem hefur á síðustu vikum verið sterklega orðaður við portúgalska liðið Benfica.
„Monsi kemur til með að styrkja hópinn verulega og verður virkilega gaman að sjá hann í Valstreyjunni á nýjan leik. Við bjóðum hann hjartanlega velkominn aftur að Hlíðarenda,“ segir m.a. í tilkynningu Vals.
Monsi varð bikarmeistari með Aftureldingu í vor og mun vitanlega ljúka leiktíðinni með Mosfellingum sem komnir eru í undanúrslit í úrslitakeppninni. Afturelding mætir Haukum annað kvöld á Varmá.
