„Við höfum fengið mikið út þessum tíma sem landsliðið hefur saman, bæði núna og eins í haust. Fjórir leikir og fullt af svörum við hinum og þessu spurningum og margt sem nýtist okkur í framhaldinu,“ sagði Arnar Pétursson landsliðsþjálfari kvenna í handknattleik í samtali við handbolta.is í dag eftir landsliðið tryggði sér sæti í umspilsleikjum um keppnisrétt á HM.
Umspilsleikirnir fara fram í apríl en dregið verður til þeirra síðar í þessum mánuði þegar Evrópumótið í Slóveníu, Svartfjallalandi og Norður Makedóníu verður til lykta leitt.
Okkar bíður alvöru verkefni
„Okkar bíður alvöru verkefni í umspilinu eftir fimm til sex mánuði. Þangað til verðum við að nýta tímann vel til þess að vinna eins og kostur er í okkar málum. Hver og einn leikmaður verður að huga að sínu þangað til við komum saman næst,“ sagði Arnar sem reiknar með að landsliðið verði kallað til æfinga í mars í alþjóðlegri landsliðsviku. Hvort leikinn verður vináttuleikur þá sagði Arnar það skýrast þegar nær dregur þeim tíma.
Æfingavika í mars
„Við eigum eftir að skipuleggja þá viku betur. Það verður eitthvað gert til þess að búa okkur undir umspilsleikina í fyrri hluta apríl,“ sagði Arnar Pétursson landsliðsþjálfari kvenna í handknattleik.
