Eftir jafntefli í KA-heimilinu í gærkvöld, 20:20, er víst að sjóða mun á keipum á sama stað í kvöld þegar KA/Þór og HC Gjorce Petrov frá Skopje í Norður Makedóníu leiða saman garpa sína öðru sinni í fyrstu umferð Evrópubikarkeppni kvenna í handknattleik. Sigurliðið tekur sæti í annarri umferð keppninnar. Tapliðið situr eftir með sárt ennið.
Flautað verður til leiks klukkan 19.30 í KA-heimilinu.
Hið unga lið KA/Þórs sýndi mikinn baráttudug í gærkvöld þegar það vann upp forskot HC Gjorce Petrov á endaspretti leiksins eftir að hafa átt undir högg að sækja lengi vel. M.a. skoraði KA/Þórsliðið tvö síðustu mörk leiksins.
KA/Þórsliðið varð fyrir skakkaföllum í leiknum í gær. Hrafnhildur Irma Jónsdóttir handleggsbrotnaði í fyrri hálfleik og Akureyri.net staðfesti.
Í síðari hálfleik fékk Anna Þyrí Halldórsdóttir þungt högg á bakið þegar hún var hindruð í hraðaupphlaupi. Leikmenn KA/Þórs munu ekki láta þessi áföll slá sig út laginu ef að líkum lætur.
Egill Bjarni Friðjónsson sendi handbolta.is myndir frá leiknum gær. Hluti þeirra birtist í syrpu hér fyrir neðan. Þökkum við Agli Bjarna fyrir sendinguna.
Gjörið svo vel að smella á myndirnar til þess að sjá þær stærri.
