- Auglýsing -
Óhætt er að segja að áhorfendur hafi fengið nánast allt fyrir aðgangseyrinn í Kaplakrika í gærkvöld þegar FH og Selfoss mættust í oddaleik í átta liða úrslitum Olísdeildar karla í handknattleik. Leikurinn var framlengdur í tvígang til þess að knýja fram hrein úrslit öðru hvoru liðinu í hag.
Ekki vantaði háspennu og dramatík í leikinn og nærri tvö þúsund áhorfendur skemmtu sé konunglega í mjög góðri umgjörð leiksins í Kaplakrika.
Svo fór að stuðningsmenn Selfoss fóru sáttari heim en FH-ingar. Selfoss vann, 38:33, og hafði þar með betur í báðum leikjunum sem fram fóru í Kaplakrika.
Selfoss leikur við Val í undanúrslitum Olísdeildar. Fyrsta viðureignin verður á mánudaginn í Origohöll Valsara. Haukar og ÍBV eigast við í hinni rimmu undanúrslitanna. Liðin mætast fyrst á sunnudaginn á Ásvöllum.
Jói Long var að vanda í Kaplakrika. Hann lætur sig sjaldan vanta þar á kappleiki með myndavél sín. Jói sendi handbolta.is myndir frá leiknum. Birtist hluti þeirra hér fyrir neðan. Ekki er útilokað að önnur syrpa frá leiknum birtist fljótlega.
Þökkum við Jóa kærlega fyrir.
- Auglýsing -
