Kvennalandsliðinu tókst ekki gera landsliði Ungverja skráveifu í fyrri viðureigninni í umspili um sæti á heimsmeistaramótinu í handknattleik sem fram fór á Ásvöllum í gær. Ungverjar fögnuðu fjögurra marka sigri, 25:21. Ekki er öll nótt úti hjá íslenska liðinu. Síðari viðureignin stendur fyrir dyrum í Érd í úthverfi Búdapest á miðvikudaginn klukkan 16.15. Íslenska liðið dregur lærdóm af leiknum í gær og leggur allt í sölurnar í Érd.
Enn einu sinni var handbolti.is svo lánsamur að hinn frábæri ljósmyndari Hafliði Breiðfjörð brá sér á Ásvelli með myndavélar sínar. Hér fyrir neðan er hluti afraksturs af heimsókn Hafliða í formi myndsyrpu þar sem sjónum er beint að leikmönnum íslenska landsliðsins sem stóðu sannarlega í ströngu. Handbolti.is þakkar Hafliða fyrir ómetanlega aðstoð.
Smellið á myndirnar til þess að sjá þær stærri.
