Andrea Jacobsen reynir að finna skotfæri hjá Hildigunni Einarsdóttur í vörninni. Mynd/HSÍ
- Auglýsing -
Íslenska landsliðið í handknattleik kvenna hélt áfram undirbúningi sínum fyrir leikinn stóra gegn Tyrkjum í undankeppni Evrópumótsins.
Eftir því sem fram kemur á vef HSÍ fengu leikmenn fengu að sofa út í morgun til að ná endanlega úr sér ferðaþreytunni. Fyrri hluta dags var og frjáls tími sem leikmenn nýttu í göngutúr í nágrenni hótelsins í Kastamonu ásamt hvíld.
Eftir hádegi fundaði Hlynur Morthens markmannsþjálfari liðsins með markmönnum liðsins og á sama tíma funduðu þeir Arnar Pétursson og Ágúst Jóhannsson með öðrum leikmönnum liðsins. Stelpurnar æfðu svo aftur í keppnishöllinni seinni hluta dags og var mikill kraftur í 90 mínútna æfingu. Hér fyrir neðan er nokkrar myndir frá síðari æfingunni sem HSÍ sendi frá sér.
Ísland mætir Tyrklandi á Kastamonu á morgun og hefst leikurinn kl. 16. Hægt verður að fylgjast með leiknum í textalýsingu á handbolta.is.