Einar Þorsteinn Ólafsson tók þátt í sínum fyrsta leik í lokakeppni Evrópumóts í handknattleik í gær þegar íslenska landsliðið mætti Serbum í fyrstu umferð C-riðils.
Hann kom inn á völlinn þegar skammt var eftir og lét strax til sín taka. Gerði usla í sóknarleik Serba með útsjónarsemi sinni og hraða. Eitt skipti vann Einar Þorsteinn boltann af sóknarmanni Serba, að því er virtist löglega. Dómararnir voru ekki á sama máli. Einari Þorsteini rann í skap og lét óánægju sína í ljós enda nokkuð hátt uppi að taka þátt í sínum fyrsta stórmótsleik. Það fór ekki framhjá portúgölsku dómurum leiksins sem voru ekki lengi að segja pilti að sletta köldu vatni í blóðið.
Skildu þeir síðan sáttir, Einar og annar dómarinn.
Hér fyrir neðan eru nokkrar myndir frá Hafliða Breiðfjörð þegar fauk í Einar Þorstein sem svo sannarlega er mikill keppnismaður eins og hann á kyn til.
