RK Partizan, sem tapaði fyrir FH í Evrópubikarkeppninni í byrjun vetrar, varð um helgina serbneskur bikarmeistari í handknattleik karla eftir maraþonleik við RK Vojvodina. Bráðabana í vítakeppni þurfti til þess að knýja fram úrslit í leiknum. Þetta er í fyrsta sinn í 11 ár sem RK Partizan vinnur titil í serbneska handknattleiknum.
Mikið gekk á meðan leikurinn fór fram en nærri þrjár klukkustundir liðu frá því að leikurinn hófst og þangað til hann var leiddur til lykta. Framlengja varð leikinn auk vítakeppni og síðan bráðabana vítakeppni. Þar á ofan sló í brýnu á milli stuðningsmanna félaganna. RK Partizan er frá Belgrad en RK Vojvodina er með bækistöðvar í Novi Sad og hefur þar á ofan verið öflugasta handknattleikslið landsins í karlaflokki á síðustu árum.
Óhætt er að segja að allt hafi ætlað um koll að keyra þegar RK Partizan tryggði sér bikarmeistaratitilinn með marki úr vítakasti eins og sést á myndskeiðinu hér fyrir ofan.
