- Auglýsing -
Fimm vikur er liðnar síðan hornamaðurinn eldfljóti, Óðinn Þór Ríkharðsson, gekkst undir aðgerð þar sem ráðin var bót á ristarbroti sem hann varð fyrir á æfingu hjá svissneska meistaraliðinu Kadetten Schaffhausen. Ristin brotnað viku fyrr á æfingu.
Svo er að sjá að útlitið sér gott hjá Óðni Þór samkvæmt myndskeiði sem Kadetten dreifði á samfélagsmiðlum í gær. Þar sést Óðinn Þór fara í gegnum ýmsar æfingar og það látið fljóta með í texta að von sé á pilti fyrr en síðar út á handknattleiksvöllinn. Myndskeiðið má sjá með heimsókn á Facebooksíðu Kadetten.
Óðinn Þór gekk til liðs við Kadetten Schaffhausen í sumar eftir að hafa átt frábært tímabil með KA. Varð hann m.a. markahæsti leikmaður Olísdeildarinnar og var einnig valinn besti leikmaður deildarinnar þegar reikningarnir voru gerðir upp í mótslok í júní. Einnig lék Óðinn afar vel með landsliðinu gegn Austurríki í apríl í undankeppni heimsmeistaramótsins.
Vegna brotsins hefur Óðinn Þór ekki leikið mótsleik með Kadetten en hann meiddist rétt fyrir viðureignina við GC Zürich í meistarakeppninni 21. ágúst.
- Auglýsing -
