Ómar Ingi Magnússon skaut Evrópumeisturum SC Magdeburg í undanúrslit Meistaradeildar Evrópu í handknattleik karla í gærkvöld þegar hann skoraði sigurmark liðsins í vítakeppni í síðari viðureign SC Magdeburg og Industria Kielce í átta liða úrslitum, 27:25.
Grípa varð til vítakeppni vegna þess að jafnt var eftir tvo leiki liðanna, 49:49, heima og heiman. Útivallamarkareglan hefur fyrir löngu verið felld niður auk þess sem leikir eru ekki lengur framlengdir í útsláttarkeppni Evrópumóta félagsliða. Þess vegna var umsvifalaust farið í vítakeppni. Í henni hafði Magdeburg betur með marki Ómars Inga. Áður hafði Sergey Hernandez markvörður Magdeburg varið vítakast frá Dylan Nahi, leikmanni Kielce.
Myndskeið af sigurmarki Ómars Inga er að finna hér fyrir neðan ásamt fögnuðinum sem tók við hjá leikmönnum Magdeburg.
𝐒𝐂 𝐌𝐚𝐠𝐝𝐞𝐛𝐮𝐫𝐠 book their ticket to Cologne in the most 𝒅𝒓𝒂𝒎𝒂𝒕𝒊𝒄 way possible! 😱👀#ehfcl #clm #handball #daretorise pic.twitter.com/5RotWWC6w0
— EHF Champions League (@ehfcl) May 1, 2024
Hafa kært
Forráðamenn Industria Kielce hafa kært framkvæmd leiksins vegna sóknar liðsins í lok venjulegs leiktíma sem var stöðvuð vegna leikbrots. Telja þeir sænska dómarana hafa hlaupið á sig. Hefði Kielce skorað úr lokasókninni hefði liðið jafnað metin og komist áfram í undanúrslit. Kæra félagsins verður tekin fyrir á næstu dögum hjá Handknattleikssambandi Evrópu.
