- Auglýsing -

Myndskeið: Starfsmanni rann skyndilega í skap í TM-höllinni

Gunnar Kristinn Malmquist Þórsson átti sér einskis ills von í TM-höllinni eftir sigurinn á Stjörnunni í gærkvöld. Mynd/Eyjólfur Garðarsson

Starfsmanni Stjörnunnar á leik Stjörnunnar og Aftureldingar í Olísdeild karla í handknattleik karla í TM-höllinni í gærkvöld virðist hafa runnið í skap þegar Aftureldingarmenn hugðust fagna sigrinum í leikslok í gærkvöld.


Leist starfsmanninum, sem er Sigurður Bjarnason fyrrverandi formaður Stjörnunnar, landsliðsmaður og atvinnumaður í handknattleik, ekki á blikuna þegar Gunnar Kristinn Malmqust Þórsson, leikmaður Aftureldingar ætlaði að nota auglýsingaskilti TM-hallarinnar til þess að slá taktinn í fögnuðinum. Síst er of djúpt í árinni tekið þegar sagt er að Sigurður hafi ekki beitt diplómatískum aðferðum við að hindra Gunnar.


Eins og sést á myndskeiði hér fyrir neðan þá var Sigurður ekkert að tvínóna og ljóst að vægustu refsingum er ekki beitt við fyrsta broti í TM-höllinni.


„Ég ber að­eins í LED skilti í eigu Stjörnunnar sem er fyrir aftan mig og sparka ör­lítið í það og þá fæ ég, að ég tel, fyrr­verandi lands­liðs­mann Sigurð Bjarna­son á mig og hann tekur á­gæt­lega á kallinum,“ segir Gunnar í samtali við Fréttablaðið í dag en það vakti fyrst athygli á uppákomunni í morgun.

Átti sér einskis ills von

Gunnar segist einskis hafa átt ills von þegar hann fékk Sigurð, sem er rammur að afli, skyndilega í fangið. Fleirum hafi runnið í skap en skilið sáttir þegar upp var staðið. Eftir því sem næst verður komist sést sem betur fer ekkert á skiltinu.

Hafði áhyggjur af skiltunum

„Hann hefur haft á­hyggjur af skiltunum sínum. Sigurður hefur sjálfur farið í gegnum nokkra hand­bolta­leiki og væntan­lega tapað nokkrum þannig ég efast um að hann hafi reiðst út í fagnaðar­sönginn okkar. Ég vona alla­vegana ekki, þá hefur hann ekki lært mikið.


Við sættumst bara eftir þetta, ég tók í spaðann á honum og baðst inni­legrar af­sökunar á þessu. Það eru til­finningar í þessu og svona getur gerst, það er bara þannig. Maður reynir að hafa eins gaman að þessu og maður getur,“ segir Gunnar en nánar er rætt við hann í meðfylgjandi frétt Fréttablaðsins.

- Auglýsing -
- Auglýsing -

Nýjustu fréttir

- Auglýsing -