Stórkostleg markvarsla Viktors Gísla Hallgrímssonar markvarðar franska liðsins Nantes og íslenska landsliðsins gegn THW Kiel í Meistaradeild Evrópu í handknattleik í gær hefur svo sannarlega vakið mikla athygli. Myndskeið hefur farið sem eldur í sinu um heim veraldarvefsins. Skal engan undra því tilþrifin eru mögnuð og voru toppurinn á frábærri frammistöðu Viktors Gísla í leiknum.
Framganga Viktors Gísla í leiknum í heild átti ekki hvað sístan þátt í átta marka sigri Nantes á THW Kiel, 38:30. Nantes er í öðru sæti í sínum riðli með átta stig, tveimur stigum á eftir Evrópumeisturum Barcelona. Viktor Gísli og félagar sækja Barcelona heim á næsta fimmtudag.
Handknattleikssamband Evrópu, EHF, hefur tekið saman fimm bestu tilþrif markvarða úr leikjum 5. umferðar. Vitanlega er Viktor Gísli þar efstur á lista og er í svo sannarlega frábærum félagsskap fjögurra annarra markvarða.
Myndskeið með fimm bestu markvörslunum:
