„Þetta var stórkostlegur leikur af okkar hálfu. Við mættum klárir í slaginn með það að markmiði að svara fyrir leikinn á laugardaginn á milli þessara liða,“ sagði Gunnar Magnússon þjálfari Aftureldingar í samtali við handbolta.is að Varmá í kvöld eftir 12 marka sigur, 35:23, á Stjörnunni í oddaleik í átta liða úrslitum Olísdeildar karla í handknattleik.
Gunnar sagði lið sitt búa að reynslunni frá síðasta ári þegar það vann bikarkeppnina og komst í undanúrslit í úrslitakeppninni hvar það lenti í hörkuleikjum. Sú reynsla verið dýrmæt í leiknum í kvöld.
Stórkostlegur stuðningur
„Síðan voru áhorfendur stórkostlegir. Með svona stuðning á pöllunum eru okkur allir vegir færir,“ sagði Gunnar ennfremur laut lofsorði á fjölmarga stuðningsmenn Aftureldingar sem mættu og létu svo sannarlega í sér heyra frá fyrstu mínútu.
Sá það inni í klefa
„Ég sá það fyrir leikinn inni í klefa að menn voru staðráðnir að mæta klárir. Við tókum undirtökin strax og hættum aldrei,“ bætti Gunnar við sem var afar ánægður með að menn gáfu aldrei þumlung eftir.
Framundan er rimma Aftureldingar og Vals í undanúrslitum en ekki er fullkomlega ljóst hvenær fyrsta viðureignin verður.
Nánar er rætt við Gunnar á myndskeiðinu efst í greininni.
Sjá einnig:
Aftureldingarmenn kjöldrógu Stjörnumenn
Olís karla: Leikjadagskrá, úrslitakeppni
