Olympiakos, sem tapaði fyrir Val í úrslitum Evrópubikarkeppninnar í handknattleik karla á dögunum, vann erkfjendur sína, AEK Aþenu, í fyrstu viðureign liðanna um gríska meistaratitilinn á heimavelli í kvöld, 25:23. Leikmenn AEK telja dómara leiksins hafa gert axarskaft á síðustu sekúndum leiksins.
AEK-liðar eru afar ósáttir við dómgæsluna á síðustu sekúndum leiksins. Þeir voru með boltann 10 sekúndum fyrir leikslok í stöðunni, 24:23. Í þeirri stöðu tapaði AEK boltanum en svo virðist, a.m.k. fyrir mann sem ekki hefur dómarapróf, að brotið hafi verið á leikmanni AEK en það farið framhjá dómurum leiksins. Olympiakos vann boltann og innsiglaði sigurinn, 25:23, á allra síðustu sekúndum.
Eins og sagt var – sjón er sögu ríkari. Myndbandið er af Facebook-síðu AEK.
Næsti leikur liðanna verður á heimavelli AEK á fimmtudaginn. Vinna þarf tvo leiki til að verða grískur meistari. AEK varð meistari á síðasta ári. Olympiakos er deildarmeistari síðan í vor. Grunnt er á því góða á milli liða félaganna sem lengi hafa eldað grátt silfur í ýmsum íþróttagreinum í gegnum tíðina.
