Alfreð Gíslason, landsliðsþjálfari Þýskalands í handknattleik karla, segir í samtali við Sport Bild að tímabært sé að fækka liðum í þýsku 1. deildinni um tvö, úr 18 niður í 16. Fækka verði leikjum svo tími gefist til landsliðsæfinga. Verði ekki gerðar breytingar geti alveg farið svo að hann haldi ekki áfram þjálfun landsliðsins.
Alfreð segir óviðundandi að fara með landslið á stórmót án þess að tími gefist til undirbúnings. Slíkt sé ekki vænlegt til árangurs. Vísar hann m.a. til undirbúningsins fyrir Ólympíuleikana í Tókýó í sumar. Útilokað sé að gera kröfu um að vinna mót eða leika til verðlauna ef undirbúningur sé lítill sem enginn. Ekki dugi að klæðast þýska landsliðsbúningum til að ná árangri.
Alfreð segist að hafa ríkan metnað og langi til starfa áfram með landsliðið. Honum hugnist hinsvegar lítt að vinna áfram við núverandi aðstæður þegar fá tækifæri gefist til að setja mark sitt á landsliðið.
Ef við viljum ná árangri þá verður landsliðið að fá meiri tíma, segir Alfreð sem er með starfssamning við þýska handknattleikssambandið fram yfir Evrópumótið sem fram fer í Ungverjalandi og Slóvakíu í janúar.
Þýska Sky fréttastofan greinir frá að uppi hafi verið hugmyndir um að með fækkun leikja megi t.d. opna fyrir að landsliðsmenn komi saman á mánudögum og þriðjudögum yfir veturinn.
