- Auglýsing -
Leikurinn við Sviss í dag var sá sextugasti og níundi sem íslenskt landslið leikur á heimsmeistaramóti í handknattleik karla á þessari öld. Aðeins einu sinni áður í leikjunum 69 hefur landsliðið skorað færri mörk en það gerði í dag. Alls voru mörkin 18, þar af tíu í fyrri hálfleik. Reyndar er þetta aðeins í þriðja sinn á öldinni sem íslenska landsliðinu lánast ekki að skora a.m.k. 20 mörk í einum leik á heimsmeistaramóti.
Fæst mörk í einum leik á þessari öld skoraði íslenska landsliðið í upphafsleik sínum á HM 2015. Þá voru skoruð 16 mörk í 24:16, tapi fyrir sænska landsliðinu. Arnór Atlason var markahæstur með fimm mörk.
Hinn leikurinn á heimsmeistaramóti á þessari öld þar sem ekki tókst að skora 20 mörk var gegn Þjóðverjum í Köln fyrir tveimur árum eða svo gott sem upp dag, 19. janúar 2019. Í það sinn tapaðist leikur við Þjóðverja, 24:19. Aron Pálmarsson og Arnór Þór Gunnarsson meiddust báðir í þeim leik. Arnór hafði skoraði sex mörk þegar hann meiddist og Aron var kominn með þrjú.
Samanlagt hefur íslenska landsliðið skorað 2.020 mörk í leikjunum 69 á þessari öld, það er 29,2 mörk að jafnaði í leik. Liðið var rúmlega 11 mörkum undir meðaltali í leiknum við Sviss.
- Auglýsing -
