Benedikt Gunnar Óskarsson, leikmaður Kolstad í Noregi, var kallaður inn í íslenska landsliðið í hasti á sunnudaginn þegar ljóst var orðið að Gísli Þorgeir Kristjánsson hefur ekki náð heilsu til þess að mæta til leiks með íslenska landsliðinu sem mætir Grikkjum í undankeppni EM í Chalkida á morgun.
„Ég var að leika í gær og fór síðan fljótlega eftir leik með Arnóri [Snæ Óskarssyni] og Sigvalda [Birni Guðjónssyni] hingað. Fórum saman um nóttina. Við flugum frá Þrándheimi til Köben og þaðan hingað til Grikklands,“ sagði Benedikt Gunnar þegar handbolti.is hitti hann eftir fyrstu æfingu landsliðsins í Chalkida síðdegis í gær.
Benedikt Gunnar kann vel við í sig Grikklandi en þetta er fjórða ferðin hingað á þremur árum. Hann lék sinn fyrsta landsleik í Aþenu fyrir ári og var svo síðan í fyrrvor í sigurliði Vals í Evrópubikarkeppninni. Sumarið 2023 lék Benedikt Gunnar með 21 árs landsliðinu í Aþenu á heimsmeistaramótinu sem fór að hluta til fram í Aþenu.
„Það er fínt að vera hér, hlýtt og gott,“ sagði Benedikt Gunnar og brosti. Hann er bærilega bjartsýnn á leikinn á morgun.
Lengra viðtal er við Benedikt Gunnar er í myndskeiði hér fyrir ofan.
Leikur Grikklands og Íslands hefst klukkan 17 að íslenskum tíma á morgun, miðvikudag. Síðari viðureignin fer fram á laugardaginn í Laugardalshöll. Miðasala er midix.is.
