Elvar Örn Jónsson og samherjar i Skjern mörðu sigur á næst neðsta liði dönsku úrvalsdeildarinnar, Ringsted, í kvöld á heimavelli, 30:29, og sitja áfram í sjöunda sæti deildarinnar með 23 stig að loknum 20 leikjum. Skjern hefur átt erfitt uppdráttar upp á síðkastið og þess vegna er þessi naumi sigur væntanlega kærkominn.
Elvar Örn Jónsson skoraði fjögur mörk úr sjö skotum, átti tvær stoðsendingar auk þess að vera einu sinni vísað af leikvelli í tvær mínutur. Elvar Örn var aðsópsmikill í varnarleik Skjern að vanda.
Skjern var marki yfir að loknum fyrri hálfleik, 14:13. Liðið á sex leiki eftir óleikna í deildarkeppninni og má ekki misstíga sig mikið á næstunni til þess að detta ekki út úr hópi átta efstu liða sem í vor munu keppast um danska meistaratitilinn.
