Hér á landi er fjölmennur hópur handknattleiksfólks frá færeyska félaginu Neistin. Um er að ræða karla- og kvennalið sem leika í færeysku úrvalsdeildinni auk 18 ára liða félagsins í kvenna- og karlaflokki. Arnar Gunnarsson er þjálfari beggja karlaliðanna en hann er að hefja sitt annað starfsár hjá Þórshafnarliðinu.
Um vikuferð er að ræða þar sem megináhersla er lögð á æfingar og æfingaleiki fyrir komandi keppnistímabil en það hefst innan tíðar. Einnig er dagskrá ferðarinnar brotin upp á ýmsan hátt með heimsóknum á áhugverða staði auk þess nýttar eru sundlaugar á höfuðborgarsvæðinu enda eru þær virkilegt nýnæmi fyrir Færeyinga eins og marga erlenda gesti hér á landi.
Í kvöld leikur karlalið Neistans æfingaleik við Víking í Víkinni og kvennaliðið mætir FH í Kaplakrika. Fleiri æfingaleikir hafa verið og verða á dagskrá næstu daga.
