Forsvarsmenn handknattleikssambands Litáen sendu frá sér neyðarkall í síðasta mánuði þegar þeir greindu frá að sú hætta væri fyrir hendi að draga verði þátttöku karlalandsliðsins á EM til baka sökum bágrar fjárhagsstöðu sambandsins.
Útilokað væri að stofna til meiri skulda og því miður virtist lítill sem enginn áhugi vera fyrir hendi á meðal fjárhagslega sterkra fyrirtækja að leggja lóð á vogarskálina. Útlitið væri fremur svart. Litáen vann sér inn keppnisrétt á EM í fyrsta sinn frá árinu 1998 og var landsliðið m.a. með því íslenska í riðli undankeppninni.
Í framhaldi af neyðarkallinu lögðust nokkrir velunnarar á árarnar með sambandinu við að skrapa saman peningum og samstarfsaðilinum sem tilbúnir voru að létta róðurinn svo ekki yrði gripið til þess óyndisúrræðis að draga landsliðið úr keppni.
Eftir því sem nú er greint frá hafa fjármunir safnast til þess að standa straum að þátttöku landsliðs Litáa á EM sem fram fer í Ungverjalandi og Slóvakíu í næsta mánuði. Veðmálafyrirtækið 7bet mun vera umsvifamest þeirra sem hlaupa undir bagga.
Áður en Litáar fara á EM koma þeir hingað til lands og mæta íslenska landsliðinu í tveimur vináttuleikjum 7. og 9. janúar.
