Noregur: Talsverð umsvif meðal Íslendinga

Umsvif íslenskra handknattleiksmanna og þjálfara á norskri grund eru sífellt að aukast. Hópur Íslendingar stóð í ströngu í dag, jafnt í úrvalsdeild karla sem kvenna.

• Landsliðsmennirnir Janus Daði Smárason og Sigvaldi Björn Guðjónsson voru í stórum hlutvekum hjá Kolstad í fimmtánda sigurleik liðsins í úrvalsdeildinni í kvöld. Kolstad vann liðsmenn Runar í Runarhallen í Sandefjord með 10 marka mun, 36:26. Sigvaldi Björn skoraði átta mörk og átti tvær stoðsendingar. Janus Daði skoraði fimm mörk og gaf átta stoðsendingar. Kolstad er efst í deildinni með 30 stig eftir 15 leiki og virðist ekkert lið geta ógnað að ráði.
  
• Hafþór Már Vignisson var í fyrsta sinn í liði ØIF Arendal í gær eftir að hafa söðlað um fyrir helgina. ØIF Arendal vann þá Bækkelaget með eins marks mun á útivelli, 29:28. Sigurmarkið var skorað á síðustu sekúndu. Hafþór Már á eftir kynnast nýjum samherjum betur og kom þess vegna ekki mikið við sögu í leiknum. ØIF Arendal er í sjötta sæti.
  
  
• Orri Freyr Þorkelsson var að vanda í liði Elverum í dag þegar það sótti Sandnes heim og vann örugglega, 31:24, eftir að hafa verið fimm mörkum yfir í hálfleik, 14:9. Orri Freyr fékk ekki úr miklu að moða í leiknum og skoraði þar af leiðandi ekki mark.
  Elverum er í öðru sæti úrvalsdeildarinnar með 24 stig eftir 16 leiki, er sex stigum og einum leik á eftir Kolstad.
  
• Hinn hálf íslenski Viktor Petersen Norberg skoraði níu mörk fyrri Drammen þegar liðið tapaði í heimsókn Kristiansand Topphåndball, 40:35. Óskar Ólafsson skoraði þrjú mörk fyrir Drammenliðið og átti einnig tvær stoðsendingar. Drammen er í þriðja sæti með 21 stig að loknum 15 leikjum.
  
  
  
• Fredrikstad Bkl., liðið sem Elías Már Halldórsson þjálfar í norsku úrvalsdeildinni í kvennaflokki, tapaði í dag fyrir Byåsen, 26:22, á heimavelli í gær. Alexandra Líf Arnarsdóttir var í leikmannahópi Fredrikstad Bkl., en skoraði ekki mark. Fredrikstad Bkl., situr í sjötta sæti með 16 stig þegar 15 leikir af 22 eru að baki.
  
• Nýliðum Volda virðast allar bjargir bannaðar eftir 13. tapið í 15 leikjum í kvöld þegar Aker Topphåndball kom í heimsókn í Volda Campus Sparebank1 Arena. Eftir mjög góðan fyrri hálfleik og fimm marka forystu, 19:14, féll leikmönnum Volda allur ketill í eld í síðari hálfleik. Aker vann öruggan sigur, 31:27.
  
• Dana Björg Guðmundsdóttir skoraði þrjú mörk fyrir Volda og Rakel Sara Elvarsdóttir tvö. Katrín Tinna Jensdóttir skoraði ekki að þessu sinni. Halldór Stefán Haraldsson er þjálfari Volda sem rekur lestina í úrvalsdeildinni.