- Auglýsing -

Brátt síðustu forvöð að skipta um félag

Laugardaginn 31. október verður síðasti dagur til félagaskipta á þessu ári fyrir leikmenn í meistaraflokki. Á það einnig við um þá sem eru orðnir 17 ára þótt þeir leiki ekki í meistaraflokki.

Félagskiptaglugginn verður opnaður á nýjan leik 7. janúar og stendur þá opinn til 1. febrúar eins og kemur fram í 10. grein reglugerðar um félagaskipti og samninga og hægt er að kynna sér á vef Handknattleikssambands Íslands.  Þar er einnig bent á að tímabundin félagaskipti eru heimil frá 1. júní til 1. febrúar ár hvert. Lágmarkstími þeirra er einn mánuður en að hámarki eitt ár.

Öll félagaskipti frá útlöndum verða að vera í höfn fyrir kl. 16, föstudaginn 30. október, segir í tilkynningu Handknattleikssambands Íslands.

Varðandi félagaskipti innanlands þá er hægt að skila þeim inn til miðnættis á laugardaginn, eins og áður sagði. Hins vegar er tekið fram að það sé á ábyrgð félaganna að öllum skilyrðum sé fullnægt svo hægt verði að gefa út keppnisleyfi strax eftir helgina þegar skrifstofa HSÍ verður opnuð á ný.

Nánar er hægt að lesa um félagaskipti  á heimasíðu HSÍ.

- Auglýsing -
- Auglýsing -

Nýjustu fréttir

- Auglýsing -