Ein af óvæntari úrslitum Olísdeildar karla í handknattleik, alltént á þessu tímabili, litu dagsins í ljós í kvöld þegar nýliðar Víkings unnu Íslandsmeistara ÍBV í Safamýri í 2. umferð Olísdeildar karla. Það sem meira er að sigurinn var öruggur, sanngjarn og afar sannfærandi, 31:26.
Víkingar voru með yfirhöndina í leiknum frá byrjun. Tveimur mörkum munaði í hálfleik, 17:15, og var það einna minnsti munurinn sem var á liðunum í hálfleiknum.
Leikmenn Víkings, sem ekki þóttu líklegir til stórræða í leiknum og jafnvel á leiktíðinni, juku við forskot sitt í síðari hálfleik. Eyjamenn komust hvorki lönd né strönd og máttu yfirgefa leikvöllinn með skottið á milli lappanna eftir fimm marka tap og vera ekki nálægt öðru stiginu, hvað þá báðum. Mestur var munurinn sjö mörk, 29:22.
Leikjadagskrá Olísdeilda og staðan.
Mörk Víkings: Daníel Örn Griffin 8, Styrmir Sigurðarson 5, Gunnar Valdimar Johnsen 5/2, Halldór Ingi Jónasson 4, Þorfinnur Máni Björnsson 3, Agnar Ingi Rúnarsson 3, Jóhann Reynir Gunnlaugsson 1, Stefán Scheving Guðmundsson 1, Sigurður Páll Matthíasson 1.
Varin skot: Sverrir Andrésson 11, 29,7%.
Mörk ÍBV: Arnór Viðarsson 7, Gauti Gunnarsson 4, Elmar Erlingsson 3/3, Sigtryggur Daði Rúnarsson 3, Breki Þór Óðinsson 2, Dagur Arnarsson 2, Daniel Esteves Vieira 1, Dánjal Ragnarsson 1, Sveinn Jose Rivera 1, Gabríel Martinez Róbertsson 1, Dániel Pintér 1.
Varin skot: Petar Jokanovic 9, 29% – Pavel Miskevich 3, 25%.
