Horfið hefur verið frá að herða á útgöngubanni í Skopje í Norður-Makedóníu. Af þeirri ástæðu fara leikir íslenska kvennalandsliðsins í forkeppni heimsmeistaramótsins á föstudag, laugardag og sunnudag síðdegis alla leikdagana í stað þess að til stóð að flauta til leiks öðrum hvorum megin við hádegið.
Til stóð fyrr í vikunni að herða á útgöngubanni í Skopje og færa það fram til klukkan 17 á daginn frá 22 að kvöldi. Áfram verður útgöngubann frá klukkan 22 að kvöldi til klukkan 5 að morgni.
Þetta kemur fram í tilkynningu frá Handknattleikssambandi Íslands. Leiktímarnir verða sem hér segir:
19. mars kl. 16, Ísland – Norður-Makedónía.
20. mars kl. 18, Ísland – Grikkland.
21. mars kl. 18, Ísland – Litháen.
Til stendur að leikjunum verði streymt á netinu. Nánari upplýsingar um streymið verður birt á handbolta.is um leið og upplýsingar berast.
Hér eru nokkrar nýjar myndir frá æfingum landsliðsins í keppnishöllinni í Skopje.