Oddaviðureign Aftureldingar og Hauka í undanúrslitum Olísdeildar karla í handknattleik hefst klukkan 20.15 á þriðjudagskvöldið í íþróttahúsinu að Varmá í Mosfellsæ. HSÍ staðfesti leiktímann rétt áðan.
Miðasala hefst á morgun, mánudag, klukkan 12 á Stubb og er ein víst að tryggja sér miða í tíma.
Sigurliðið leikur við ÍBV í úrslitum um Íslandsmeistaratitilinn. Ljóst er að fyrsti leikur í úrslitum verður í Vestmannaeyjum á laugardaginn hvort heldur Afturelding eða Haukar vinna oddaviðureignina.
Handboltahátíð í Eyjum
Handboltahátíð verður í Vestmannaeyjum á laugardaginn. Tveir leikir verða á dagskrá. Auk fyrsta leiks í úrslitum í karlaflokki er stefnan sett á þriðja leik í úrslitum í kvennaflokki sama daginn. Þriðja viðureign ÍBV og Vals hefur verið færð af föstudegi yfir á laugardag.
Kvennaleiknum seinkað
Ástæða þess að oddaleikur Aftureldingar og Hauka hefst ekki fyrr en klukkan 20.15 á þriðjudaginn er sú að annar leikur Vals og ÍBV í úrslitum í kvennaflokki var færður af mánudegi yfir á þriðjudag. Mun það vera gert vegna úrslitaleiks Tindastóls og Vals í úrvalsdeild karla í körfuknattleik sem háður verður á Sauðárkóki á mánudagskvöld.
Leikur Vals og ÍBV á þriðjudaginn byrjar klukkan 18. Klukkan 20.15 verður flautað til leiks að Varmá þar sem úr því fæst skorið hvort Afturelding eða Haukar sækja ÍBV heim til Eyja á laugardaginn.
