Óðinn Þór Ríkharðsson heldur áfram að fara nánast með himinskautum með svissneska meistaraliðinu Kadetten Schaffhausen. Hann skoraði 13 mörk í kvöld í 16 skotum í 14 marka sigri Kadetten á RTV Basel, 36:22, á heimavelli.
Þrjú marka sinna skoraði Óðinn Þór úr vítaköstum. Ljóst er að Aðalsteinn Eyjólfsson þjálfari Kadetten hefur dottið í lukkupottinn þegar hann krækti í Óðinn Þór fyrir leiktíðina því eftir að Óðinn Þór mætti til leiks fyrir um hálfum mánuði hefur hann ekki skorað færri en 10 mörk í leik með liðinu.
Rétt áður en keppnisímabilið hófst ristarbrotnaði Óðinn Þór en hefur svo sannarlega jafnað sig, svo hressilega að honum halda bókstaflega engin bönd.
Kadetten er efst í deildinni með 24 stig eftir 14 leiki en hefur leikið tveimur leikjum fleira en HC Kriens sem leikið hefur tveimur leikjum færra og einnig tapað fjórum stigum.
Ólafur var markahæstur
Ólafur Andrés Guðmundsson skoraði átta mörk og var markahæstur þegar GC Zürich lagði HC Kriens á heimavelli í hörkuleik, 29:28. Staðan var jöfn í hálfleik, 14:14.
GC Zürich er í fjórða sæti með 13 stig eftir 11 leiki.
