Leikið verður til verðlauna í fyrramálið, að íslenskum tíma, í handknattleikskeppni Ólympíuleikanna í Tókýó. Eftir tveggja vikna keppni og 36 leiki milli liða frá 12 þjóðum standa fjögur eftir sem berjast um verðlaunin. Eitt þeirra fjögurra fer tómhent heim eins og þau átta sem þegar hafa kvatt keppnina.
Frakkar, Danir og Spánverjar hafa í gegnum tíðina unnið til verðlauna á heimsmeistaramótum og Ólympíuleikum. Egyptar hafa aldrei unnið til verðlauna á áðurgreindum stórmótum. Þeir komust næst því á HM 2001 er þeir töpuðu fyrir því sem eftir stóð af Júgóslavíu í leik um bronsverðlaun.
Frakkar eiga tvenn gullverðlaun, ein silfurverðlaun og ein bronsverðlaun frá handknattleikskeppni Ólympíuleika. Danir unnu gullverðlaun á síðustu leikum en það eru einu gullverðlaun þeirra í karlaflokki. Spánn hefur þrisvar unnið bronsverðlaun, 1996, 2000 og 2008.
Danir eru ríkjandi Ólympíumeistarar.
Kl. 08.00 Egyptaland – Spánn.
Kl. 12.00 Frakkland – Danmörk – RÚV2.
