Framkvæmdastjóri HSÍ hefur vísað ummælum Einars Jónssonar þjálfara karlaliðs Fram til aganefndar sem mun taka þau fyrir á vikulegum fundi í sínum á morgun. Handbolti.is fékk þetta staðfest fyrir stundu.
„Gauti bombar í andlitið á honum, ég held hann þoli ekki þennan gaur þannig að ég skil það vel að hann hafi bombað í andlitið á honum,“ sagði Einar í samtali við Vísi/Stöð2 eftir leik FH og Fram sem fram fór í Kaplakrika á síðasta fimmtudag.
Einar hafði þá verið spurður út í atvik í lok leiks liðanna þegar Þorsteinn Gauti Hjálmarsson kastaði beint úr aukakasti eftir að leiktíminni við úti. Skot Þorsteins hafnaði í andlitinu eða höfðinu á Birgi Má Birgissyni leikmanni FH.
Talsverður hiti var í leiknum í Kaplakrika og rann mörgum í skap í lokin eftir aukakastið. Viðureigninni á leikvellinum lauk með jafntefli, 25:25.
Aganefnd kemur saman á morgun til síns vikulega fundar. Eftir því sem næst verður komist má reikna með að aganefnd úrskurði í málinu á morgun enda mun Fram ekki hafa tíma nema til hádegis á morgun að senda inn greinargerð.
Einar verður væntanlega á hliðarlínunni í kvöld þegar Fram sækir Val heim í Origohöllina í Olísdeild karla. Flautað verður til leiks klukkan 19.30 og verður fylgst með leiknum á handbolti.is.
