Orri Freyr Þorkelsson hornamaður Elverum í Noregi gengur til liðs við Sporting í Lissabon í sumar. Nils Kristian Myhre, sem hefur umsjón með leikmannamálum Elverum, sagði frá vistaskiptum Orra Freys í samtali við Østlendingen í gær þar sem Myhre fór yfir breytingar sem verða á leikmannahópi Elverum að lokinni yfirstandandi leiktíð.
Tveir fyrstu í Portúgal?
Hvorki Sporting né Orri Freyr hafa staðfest þessar fregnir. Gangi þetta eftir verða væntanlega tveir íslenskir vinstri hornamenn með félagsliðum í Portúgal á næsta keppnistímabili. Stiven Tobar Valencia hefur verið sterklega orðaður við hitt liðið í Lissabon, Benfica. Þeir verða væntanlega fyrstu Íslendingarnir til að leika með portúgölskum félagsliðum í efstu deild karla.
Var með á EM
Orri Freyr, sem var með Haukum, áður en hann gekk til liðs við Elverum sumarið 2021, lék með íslenska landsliðinu á Evrópumótinu í Ungverjalandi í upphafi árs 2022 þegar landsliðið hafnaði í sjötta sæti. Hann hefur undanfarin tvö tímabil leikið með Elverum.
Elverum vann alla titla í Noregi leiktíðina 2021/2022 og hafnaði í öðru sæti í úrvalsdeildinni í vor á eftir Kolstad. Nú þegar hefur Elverum unnið tvo fyrstu leikina gegn Nærbø í undanúrslitum úrslitakeppninnar og getur unnið einvígið með sigri á heimavelli á sunnudaginn.
