- Auglýsing -
Orri Freyr Þorkelsson og félagar í norska meistaraliðinu Elverum eru komnir í úrslit í norsku bikarkeppninni í handknattleik eftir nauman sigur á Drammen, 32:31, í Drammen í kvöld. Drammenliðið var aðeins hársbreidd frá því að ná framlengingu því einn leikmanna liðsins var millimetrum frá að komast inn í sendingu milli Elverummanna á lokasekúndum leiksins.
Elverum mætir ØIF Arendal Elite í úrslitaleik bikarkeppninnar í Oslo Spektrum 29. desember. Þar með lauk sjö ára bið ØIF Arendal Elite eftir að leika til úrslita í bikarkeppninni. Elverum leikur til úrslita fjórða árið í röð.
Orri Freyr skoraði ekki mark fyrir Elverum að þessu sinni. Óskar Ólafsson skoraði eitt mark fyrir Drammen og var einu sinni vísað af leikvelli. Hinn hálf íslenski Viktor Petersen Norberg skoraði tvisvar sinnum fyrir Drammen liðið í þessum æsispennandi leik sem fram fór að viðstöddum 2.000 áhorfendum í Drammenshallen.
- Auglýsing -
