Orri Freyr Þorkelsson sló upp sýningu í Jotunhallen í Sandefjörd í dag og skoraði 13 mörk í 22 marka sigri norsku meistaranna í Elverum á liðsmönnum Sandefjord. Heimamenn áttu sér aldrei viðreisnar von gegn meisturunum og voru 12 mörkum undir strax í hálfleik, 23:11.
Orri Freyr, sem gekk til liðs við Elverum í sumar, hefur farið á kostum í hverjum leiknum á fætur öðrum í norsku úrvalsdeildinni. Honum héldu engin bönd í dag en aðeins þrjú skot hans misstu marks.
Emil Kheri Imsgard, samherji Orra Freys, átti einnig stórleik í markinu og varði helming þeirra skota sem á mark hans komu.
Næsti leikur Orra Freys og félaga verður alveg örugglega erfiðari en fyrir dyrum stendur að þeir mæti þýsku meisturunum THW Kiel í Meistaradeild Evrópu um miðja viku á heimavelli Kiel.
