Þrefaldir meistarar síðasta keppnistímabils, Valur, mæta sterkir til leiks á nýju keppnistímabili ef marka má frammistöðu þeirra gegn KA í meistarakeppni HSÍ í Origohöllinni í dag. Valsmenn voru talsvert sterkari en KA-menn frá upphafi til enda og unnu með átta marka mun, 37:29, eftir að hafa verið sex mörkum yfir í hálfleik, 21:15.
Þetta er annað árið í röð sem Valur hefur leiktíðina með því að vinna leikinn í meistarakeppninni.
Varnarleikur og hröð upphlaup voru aðalsmerki Vals í þessum leik. Með þeim lögðu þeir grunninn að sigrinum.
Valur er nánast með sama leikmannahóp og á síðasta tímabili. Helstu kempurnar báru hitann og þungan af leiknum að þessu sinni.
Talsverðar breytingar hafa orðið á leikmannahópi KA. Þar er lítt reyndari leikmenn að öðlast stærra hlutverk eins og Skarphéðinn Ívar Einarsson, Dagur Árni Heimisson og Arnór Ísak Haddsson. Það verður gaman að fylgjast með þeim vaxa með KA-liðinu á tímabilinu.
Mörk Vals: Benedikt Gunnar Óskarsson 11, Stiven Tobar Valencia 8, Arnór Snær Óskarsson 7, Finnur Ingi Stefánsson 4, Róbert Aron Hostert 2, Björgvin Páll Gústavsson 1, Tjörvi Týr Gíslason 1, Alexander Örn Júlíusson 1, Magnús Óli Magnússon 1, Þorgils Jón Svölu Baldussson 1.
Varin skot: Björgvin Páll Gústavsson 10.
Mörk KA: Einar Rafn Eiðsson 7, Arnór Ísak Haddsson 6, Allan Norðberg 5, Skarphéðinn Ívar Einarsson 4, Dagur Gautason 2, Gauti Gunnarsson 2, Einar Birgir Stefánsson 2, Dagur Árni Heimisson 1.
Varin skot: Nicholas Satchwell 7, Bruno Bernat 5.
Handbolti.is var í Origohöllinni og fylgdist með leiknum í textalýsingu hér fyrir neðan.
