Óttast að Benedikt Gunnar hafi tognað í nára

Óttast er að Benedikt Gunnar Óskarsson leikmaður Vals hafi tognað í nára í síðari hálfleik í viðureign Vals og Frisch Auf! Göppingen í Origohöllinni í gærkvöld í 16-liða úrslitum Evrópudeildarinnar í handknattleik karla. Sé svo verður Benedikt Gunnar væntanlega ekki með í síðari leik liðanna sem fram fer ytra á næsta þriðjudag.

Komi í ljós slæm tognun getur alveg farið svo að Benedikt Gunnar verði af fleiri leikjum Valsliðsins. Valur á þrjá leiki eftir í Olísdeildinni en lokaumferð verður 10. apríl, á öðrum degi páska.

Nokkuð er síðan að Valur tryggði sér deildarmeistaratitilinn í Olísdeild karla.

Valur tapaði leiknum við Göppingen í gær með sjö marka mun, 36:29.