Dagur Gautason skoraði sex mörk, þar af þrjú úr vítaköstum, þegar lið hans ØIF Arendal tapaði á heimavelli fyrir Halden, 30:29, í annarri umferð norsku úrvalsdeildarinnar í dag. Tapið kom talsvert á óvart eftir jafntefli ØIF Arendal og meistara Kolstad í fyrstu umferð deildarinnar fyrir viku, 33:33.
Hafþór Már Vignisson náðu sér ekki á strik með ØIF Arendal og kom lítt við sögu.
Leikmenn ØIF Arendal byrjuðu leikinn illa og fengu svo sannarlega að súpa seyðið af því. Þeir voru sjö mörkum undir í hálfleik, 17:10. Þrátt fyrir mun betri leik í síðari hálfleik þá dugði það ØIF Arendal ekki til þess að krækja í annað stigið, hvað þá bæði. Thomas Stenersen stráði salti í sárin með því að skora sigurmark Halden fimm sekúndum fyrir leikslok.
Kolstad er í efsta sæti deildarinnar með þrjú stig eftir sigur á Bergen Håndball, 32:25, í Björgvin í gær. Sigvaldi Björn Guðjónsson skoraði átta mörk í leiknum, þar af tvö úr vítaköstum.
Keppni er rétt að hefjast í norsku úrvalsdeildinni. Mörg hafa leikið í fyrsta sinn um helgina.
