Óvæntur mótherji Bjarna Ófeigs og félaga í úrslitum

Bjarni Ófeigur Valdimarsson og félagar í IFK SKövde mæta Ystads IF í úrslitum um sænska meistaratitilinn í handknattleik karla. Mörgum að óvörum þá vann Ystads IF ríkjandi meistara og nýkrýnda deildarmeistara IK Sävehof með þremur vinningum gegn einum í undanúrslitum. Fjórða og síðasta leiknum lauk með sigri Ystads IF, 29:26, á heimavelli í gærkvöld.

Leikmenn Sävehof voru með vænlega stöðu að loknum fyrri hálfleik, 15:11. Þeim féll allur ketill í eld í síðari hálfleik. Ystads IF hafnaði í fjórða sæti deildarkeppninnar í vor.

Þrír áratugir eru liðnir síðan Ystads IF vann síðast sænska meistaratitilinn. IFK Skövde hefur aldrei hreppt hnossið svo ljóst er að úrslitin í deildinni verða söguleg.

Fyrsti úrslitaleikurinn verður á heimavelli IFK Skövde á næsta fimmtudag, önnur viðureignin verður tveimur dögum síðar í Ystad og sú þriðja hinn 24. maí í Skövde. Vinna þarf þrjá leiki til þess að verða sænskur meistari.

IFK Skövde vann Kristianstad í undaúrslitum, 3:1, í vinningum talið. Bjarni og félagar leika annað árið í röð til úrslita. Þeir töpuðu 3:0 fyrir Sävehof úrslitum fyrir ári.

Lokapróf í meistaranámi að morgni og sæti í úrslitum að kveldi