Lið Kristjáns Arnar Kristjánssonar, Donna, PAUC-Aix, saknaði íslensku stórskyttunnar í kvöld þegar það fékk grannliðið Montpellier í heimsókn í frönsku 1. deildinni í handknattleik. Montpellier vann með fimm marka mun, 32:27, og situr eftir sem áður í öðru sæti deildarinnar tveimur stigum á eftir PSG sem hefur leikið einum leik færra og hefur ekki tapaði stigi það sem af er.
Donni er kominn inn á beinu brautina eftir að hafa greinst „hálfjákvæður“ í kórónuveiruprófi fyrir um 10 dögum eins og hann greindi handbolta.is frá. Donni fór í skimun í dag og verði niðurstaðan eins vonir standa til þá ætti hann að geta hafið æfingar á nýjan leik með samherjum sínum á morgun.
PAUC-Aix er í fjórða sæti deildarinnar með 22 stig en hefur aðeins lokið 16 leikjum og á 14 leiki eftir. Leikjadagskrá frönsku 1. deildarinnar er fyrir löngu komin úr skorðum. Það telst stórvirki takist að ljúka 30 umferðum fyrir byrjun sumars. Sum lið hafa aðeins lokið helmingi leikja sinna og aðeins eitt hefur náð 20 leikjum, þ.e. tveimur þriðja hluta viðureigna sinna. Síst bætir úr skák að kórónuveiran herjar enn af þunga víðast hvar í Frakklandi.
