Paulo Pereira landsliðsþjálfari Portúgal í handknattleik karla verður ekki við hliðarlína á morgun þegar portúgalska landsliðið mætir ungverska landsliðinu í lokaumferð D-riðils heimsmeistaramótsins í handknattleik karla. Pereira hefur verið úrskurðaður í eins leiks bann til viðbótar fyrir að hafa verið í talsambandi við aðstoðarþjálfarann Paulo Fidalgo meðan á leik Íslands og Portúgal stóð í Kristianstad Arena á fimmtudagskvöld.
Voru í talsambandi
Pereira var í leikbanni í leiknum við Íslendinga og reyndar einnig gegn Suður Kóreu og mátti þar af leiðandi ekki koma nærri stjórnun liðsins meðan leikurinn stóð yfir. Grunur lék á að hann væri í talsambandi við aðstoðarþjálfarann. Pereira sat einn í lokaðri stúku allan leikinn með tölvu fyrir framan sig og heyrnatól í eyrum. Virtist honum á stundum vera mikið niðri fyrir. Sömu sögu var að segja um Fidalgo aðstoðarþjálfara sem einnig var með smá hvít heyrnartól í eyrum.
Bar fyrir sig skertri heyrn
Á blaðamannafundi eftir leikinn gegn Íslandi svaraði Fidalgo aðstoðarþjálfari því til að hann væri með skerta heyrn og hafi þar af leiðandi verið með heyrnatól. Reyndar virtist honum vefjast tunga nokkuð um tönn er hann svaraði spurningu Þorkels Gunnars Sigurbjörnssonar fréttamanns RÚV vegna þessa.
Fidalgo var hinsvegar ekki með nein sýnileg tæki í eyrunum í gær þegar Portúgal mætti Suður Kóreu.
Nú virðist hafið yfir vafa að Pereira og Fidalgo voru í símasambandi meðan leikurinn við Ísland stóð yfir. Pereira verður þar með í banni á morgun og á auk þess von á fjársekt samkvæmt frétt TV2 í Danmörku.
