- Auglýsing -
- Auglýsing -
- Auglýsing -

Rafmagn sló út í þrumuveðri í Skopje – hálf leikin viðureign flutt á milli húsa

Úr sögulegum leik Danmerkur og Suður Kóreu á HM 20 ára landsliða í dag. Mynd/IHF
- Auglýsing -

Viðureign Dana og Suður Kóreu í milliriðli 2 í 16-liða úrslitum heimsmeistaramóts 20 ára landsliða kvenna í handknatleik varð afar sögulegur en leikurinn fór fram í tveimur keppnishöllum í Skopje í Norður Makedóníu. Fyrri hálfleikur var háður í Jane Sandanski Sports Center, heimavelli Vardar. Meðan leikurinn stóð yfir gerði úrhellisrigningu ásamt þrumum og eldingum í Skopje með þeim afleiðingum að rafmagn sló út í hluta borgarinnar. Gerðist það einmitt meðan hálfleikur stóð yfir í leiknum.

Ekki tókst að koma rafmagni á í Jane Sandanski Sports Center þrátt fyrir ítrekaðar tilraunir. Talið er að eldingu hafi lostið niður í spennustöð nærri keppnishöllinni.

Vegna rafmagnsleysis var gripið til þess ráðs að flytja leikmenn, þjálfara, dómara og aðra starfsmenn yfir í þjóðarhöllina, Boris Trajkovski Sports Center, til að leika síðari hálfleikinn. Um stundarfjórðungs akstur er á milli keppnishalla.

Rafkerfið í Boris Trajkovski Sports Center stóðst álagið í veðuráhlaupinu. Hittist svo vel á að viðureign Sviss og og Rúmeníu í milliriðli var að ljúka og gátu leikmenn Danmerkur og Suður Kóreu þar með fljótlega tekið upp þráðinn.

Danir unnu leikinn, 29:23, eftir að hafa verið sjö mörkum yfir, 19:12, eftir fyrri hálfleik. Tryggðu Danir sér þar með sæti í átta liða úrslitum eins og Ungverjar, Hollendingar og Svisslendingar sem einnig unnu leiki sína í dag.

HMU20 kvenna: Milliriðlar, leikir, úrslit og staðan

Vafalaust er það einsdæmi að leikur á heimsmeistaramóti í handknattleik sé leikinn í tveimur keppnishöllum.

Eftir hitabylgju í Skopje síðustu vikur með allt að 40 gráðu hita dró ský fyrir sólu síðdegis með úrhelli. Fór nánast allt á flot í borginni á skömmum tíma. Eftir því sem næst verður komist hefur stytt upp. Í veðurspá fyrir næstu daga er ekki útilokað að áfram gangi á með skúrum af og til og hugsanlegu þrumuveðri.

Viðureign Íslands og Svartfjallalands á morgun fer fram í Boris Trajkovski Sports íþróttahöllinni.

- Auglýsing -
- Auglýsing -
- Auglýsing -
- Auglýsing -
- Auglýsing -
- Auglýsing -