Ragnarsmótið í handknattleik hófst í Iðu á Selfossi en þetta er í 33. sinn sem mótið er haldið. Þessa vikuna verður leikið í karlaflokki en í kvennaflokki í næstu viku.
Leikmenn ÍBV og Stjörnunnar riðu á vaðið í gær í upphafsleik mótsins. ÍBV hafði betur og vann með fjögurra marka mun, 32:28.
Í síðari leik kvöldsins unnu Framarar undir stjórn nýs þjálfara, Einars Jónssonar, liðsmenn Selfoss, 28:24.
ÍBV – Stjarnan 32:28 (16:16)
Ótrúlega hraður leikur eins og tölurnar gefa til kynna og mætti segja að Petar Jokanovic, markmaður Eyjamanna, hafi verið munurinn á liðunum. Leikurinn var nokkuð jafn þar til ÍBV sigu framúr síðustu 10-15 mínúturnar.
Makahæstir hjá ÍBV: Dánjal Ragnarsson 7, Gabríel Martinez Róbertsson 5.
Markahæstir hjá Stjörnunni: Dagur Gautason 5, Þórður Tandri Ágústsson 5, Tandri Már Konráðsson 4, Gunnar Steinn Jónsson 4.
Selfoss – Fram 24:28 (13:15)
Annar leikur þar sem markvarsla réði miklu um niðurstöðuna, en Lárus Helgi Ólafsson var afar öflugur í marki Fram. Þetta var skemmtilegur leikur þar sem Selfyssingar tefldu fram mörgum ungum leikmönnum. Fram hafði frumkvæðið svo til allan leikinn og voru ekki miklar sveiflur í viðureigninni.
Markahæstir hjá Selfoss: Einar Sverrisson 4, Hergeir Grímsson 3, Ragnar Jóhannsson 3, Guðjón Baldur Ómarsson 3, Arnór Logi Hákonarson 3.
Markahæstir hjá Fram: Vilhelm Poulsen 5, Breki Dagsson 4, Stefán Arnarson 4, Kristófer Sigurðsson 3.
Mótið heldur áfram í kvöld. Þá eigast við Stjarnan og Haukar klukkan 18.30 og Fram og Afturelding klukkan 20.15. Frítt er inn á alla leiki mótsins og einnig eru þeir sendir út á Selfoss TV.
