Ragnheiður Sveinsdóttir leikmaður Hauka var í dag úrskurðuð í eins leiks bann á fundi aganefndar HSÍ. Ragnheiður hlaut útilokun með skýrslu vegna mjög grófrar ódrengilegrar hegðunar í leik Hauka og Vals í Olísdeild kvenna á síðasta laugardag.
Ragnheiður verður gjaldgeng með Haukum annað kvöld gegn ÍBV í 16-liða úrslitum Poweradebikarsins þrátt fyrir úrskurðinn vegna þess að hann tekur ekki gildi fyrr en á fimmtudaginn, eins og aðrir úrskurðir aganefndar.
Dómarar leiks Hauka og Vals mátu brot Ragnheiðar falla undi reglu 8:10 c)., sem alla jafna þýðir eins leiks bann.
Dregið til baka
Rautt spjald sem ÍR-ingurinn Róbert Snær Örvarsson fékk vegna mjög grófrar ódrengilegrar hegðunar í leik Fram U og ÍR í Grill 66-deild karla á síðasta laugardag var dregið til baka. Eftir að hafa legið undir feld var það mat dómaranna að þeir hafi hlaupið á sig þegar þeir sýndu Róberti rauða spjaldið. Þess vegna drógu þeir spjaldið til baka að vandlega athuguðu máli. Féllst aganefnd á að endurskoða skoðun dómaranna og verður Róbert þar með gjaldgengur með ÍR í næsta leik eins og ekkert hafi ískorist.
Sleppa með áminningu
Endijs Kusners leikmaður Harðar og Benedikt Gunnar Óskarsson leikmaður Vals fengu einnig útilokun með skýrslu í síðustu leikjum liðanna. Kusners með Herði gegn Þór í Grill 66-deild karla á laugardaginn og Benedikt Gunnar í leik með Val á móti ÍBV í Eyjum á sunnudaginn.
Báðir sleppa þeir með áminningu og athygli beggja vakinn á stighækkandi áhrifum útilokana fyrir brot af þessu tagi.
Úrskurð aganefndar er hægt að nálgast hér fyrir neðan.
