Evrópu- og heimsmeistarar Noregs eru öruggir um sæti í undanúrslitum á Evrópumótinu í handknattleik kvenna í Slóveníu. Norska landsliðið vann landslið Slóveníu í frábærum handboltaleik í Ljubljana í kvöld, 26:23, eftir að hafa verið marki yfir, 16:15, að loknum fyrri hálfleik.
Slóvenar veittu harða mótspyrnu allt til loka og máttu leikmenn norska landsliðsins sýna sínar allra bestu hliðar til þess að tryggja sér sér sigurinn á lokasprettinum. Þar gekk Henny Reistad fram fyrir skjöldu þegar erfiðleikar voru í sóknarleik norska liðsins. Hún skoraði þrjú afar mikilvæg mörk á síðustu mínútunum og 10 alls í leiknum í 12 skotum.
Maja Vojnovic markvörður Slóvena átti stjörnuleik í síðari hálfleik. Um tíma stefndi í að hún myndi ríða baggamuninn og fella norska liðið. Sú varð ekki raunin þegar kom fram á síðustu mínúturnar. Þá réði hún ekkert við skotin frá Reistad.
Ana Gros bar lengst af uppi sóknarleik Slóvena sem nutu frábærs stuðnings í Arena Stozice. Slóvenar eiga enn möguleika á sæti í undanúrslitum þrátt fyrir tapið. Vinni þeir Ungverja á miðvikudaginn og Danir ná ekki stigi gegn Noregi fylgja Slóvenar Norðmönnum í undanúrslit úr milliriðli eitt. Slóvenar standa betur að vígi í innbyrðisleik við Dani eftir sigur á þeim í upphafsleik mótsins.
Mörk Noregs: Henny Ella Reistad 10, Nora Mørk 6, Stine Oftedal 4, Anniken Wollik 2, Malin Larsen 1, Kristine Breistøl 1, Vilde Ingstad 1, Maren Aardahl 1.
Varin skot: Katrine Lunde 5, 38% – Silje Solberg 4, 21%.
Mörk Slóveníu: Ana Gros 5, Natasa Ljepoja 4, Valentina Klemenic 3, Elizabeth Omoregie 3, Tamara Mavsar 3, Nina Zulic 2, Barbara Lazovoc 2, Alja Varagic 1.
Varin skot: Maja Vojnovic 8, 42% – Arma Pandzic 3, 18% – Branka Zec 0.
Staðan í milliriðli 1:
| Noregur | 4 | 4 | 0 | 0 | 117 – 93 | 8 |
| Danmörk | 4 | 3 | 0 | 1 | 106 – 83 | 6 |
| Slóvenía | 4 | 2 | 0 | 2 | 99 – 103 | 4 |
| Svíþjóð | 3 | 1 | 0 | 2 | 81 – 74 | 2 |
| Króatía | 4 | 1 | 0 | 3 | 79 – 102 | 2 |
| Ungverjaland | 3 | 0 | 0 | 3 | 67 – 82 | 0 |
EM kvenna22 – milliriðlakeppni leikjadagskrá, úrslit.
