Rússneska handknattleikssambandið hefur fyrirvaralaust sagt upp þjálfara kvennalandsliðsins, Ambros Martín. Hann fékk að taka pokann sinn í gærkvöld strax að loknum tapleik við Dani í lokaumferð milliriðlakeppni EM í handknattleik. Tapið varð til þess að rússneska landsliðið leikur ekki til verðlauna á mótinu sem er undir vonum.
Sergey Shishkarev, forseti rússneska handknattleikssambandsins staðfesti uppsögnina m.a. í samtali við danska fjölmiðla. Hann sagði að Martín verði ekki þjálfari landsliðsins þegar það mætir Hollendingum á föstudaginn í leik um fimmta sætið á EM.
„Martín sagði á dögunum að hugur hans væri bundinn við landsliðið annarsvegar og fjölskyldunnar hinsvegar. Við ætlum þess vegna að gefa honum ráðrúm til að einbeita sér að fjölskyldunni. Ég þekki það vel sem fjölskyldufaðir,“ er haft eftir Shishkarev í dönskum fjölmiðlum.
Shishkarev, sem einn efnaðist maður Rússlands, segir að stjórn rússneska handknattleikssambandsins ákveði fljótlega hver taki við þjálfun landsliðsins og stýri því í lokaleiknum á EM í umspilsleikjum fyrir HM í vor.
Martín tók þjálfun rússneska kvennalandsliðsins fyrir rúmu ári af hinum lítríka Evgeny Trefelov. Undir stjórn Martín hafnaði rússneska landsliðið í þriðja sæti á HM fyrir ári.
