- Auglýsing -

Reynum alltaf að vinna þegar bikar er í boði

Leikmenn Vals taka við sigurlaunum sínum eftir viðureignina við Fram í meistarakeppni HSÍ í gær. Mynd/HSÍ

„Fyrst og fremst stendur upp úr er að hafa unnið leikinn. Það er alltaf gaman að vinna bikar þótt þetta sé kannski ekki sá sem við stefnum fyrst og fremst á. Þegar bikar er í boði þá reynir maður hvað maður getur til að vinna. Mínir leikmenn lögðu allt í leikinn og ég er ánægður með það,“ sagði Ágúst Þór Jóhannsson þjálfari Vals, við handbolta.is í gær eftir sigur Vals á Fram, 23:19, í meistarakeppni HSÍ í kvennaflokki. Leikið var í nýju og glæsilegu íþróttahúsi Fram í Úlfarsárdal.


„Það var fyrst og fremst mjög gott að vinna leikinn. Hann reyndi talsvert á þolinmæðina hjá okkur þar sem við stóðum lengi í vörn í hvert sinn. Meðal annars náðum við í 39 aukaköst sem er mjög gott,“ sagði Ágúst Þór en lið hans var með yfirhöndina allan leiktímann.

Meira forskot eftir fyrri hálfleik

Ágúst Þór sagði að hann hefði vilja fara inn með meira en tveggja marka forskot í hálfleik, 11:9. Munurinn hafi verið meiri á liðunum í fyrri hálfleik en tölurnar gáfu til kynna. „Við fórum illa með seinni bylgju hraðaupphlaupin okkar, skutum illa á markið. Fram tókst að halda niðri hraðanum í leiknum, gerði það vel. Þar af leiðandi var um ræða leika í 60 mínútur,“ sagði Ágúst Þór.

Ekkert óeðlilegt

Gamli góði haustbragurinn var greinilegur á leik beggja liða að mati Ágústs Þórs. „Það er svo sem ekki óeðlilegt þar sem um var að ræða fyrsta alvöruleikinn á keppnistímabilinu auk þess sem það vantaði sterka leikmenn í bæði lið.


Hinsvegar var afar jákvætt að sjá að margir yngri leikmenn fengu að spreyta sig sem á köflum sýndu góða tilburði,“ sagði Ágúst Þór og bætti við að á næstu vikum og mánuðum muni leikur Vals slípast betur saman, jafnt í sókn sem vörn en Valur hefur verið að þjálfa upp 6/0 vörn sína en einnig 5/1 varnarafbrigði.


„Framan af tímabili vinnum við jafnt og þétt í að bæta leik okkar. Allt snýst þetta um að toppa eftir átta til níu mánuði,“ sagði hinn þrautreyndi þjálfari Vals, Ágúst Þór Jóhannsson, í samtali við handbolta.is í gær.


- Auglýsing -
- Auglýsing -

Nýjustu fréttir

- Auglýsing -